Demokratie valiert by Severin Gomboc

Do spazier I mi durchd Siedlung
Mit meine Stecker im Ohr
Vo da weidn hea is schimpfen
Am Goatentor
Jetzt haums scho wieder a Weib dastochn
In Wean mittn auf da Stroß
Dass a Ausländer woa is erna eh ollen kloa

Mei Musi kaun i goa ned
Laut gnuag aufdrahn
Ernan Hossn den hea I bis
Tiaf in mir drinn

Und waun i ehrlich bin
Kau i ernan Zorn a vasteh
Und i frog mi woa i vielleicht
A a bissl blind

Zmittog in da Stodt kumt ma so a
Glotzkopftruppen entgegen
Nur das de heidzutog scho mehr
Hoa haum ois i

De schreien fria is ois besser gwen
Und dass da Kickl grod recht kummt
Wir dengan olle des söwe
Dass die Gsöschofft mehr und mehr vadummt

Nach den Anblick geh int Oaweit
Und i redt mit ana Frau
De seit 30 Joa scho do is
Owa nu ka Woat Deitsch kau

Weils da Oide imma gschlogn hod
Bei Tog und bei Nocht
Wos bei 5 Kinder
Ned überlegn hod kena
Wos ihr a Freid mocht

Beim Ausigeh stöh i mi
Zur Bushoitestöh
Und les im Gratispapierl
Wos sie so duad
Auf dera Wöd

Jo Furcht vor da nächsten Wön
So wia im 15er Joa
Dass in Mauthausen wieder gschmiert haum
Des kumt durt mit kan Wuat vor

Jo am Obnd triff i nu an Oiden Kollegen
Und a waun ma ned des söwe dengan
Gfrei i mi waun ma uns seng
Ob und zua zumindest hob i
Die Treffn a gaunz gern
Und waun ma streitn woin
Dann ma sie unsre Ansichten anhean

Beim Schwochsinnigkeitsbingo kau i glei
Olle hagln mochn
Vo "de neman uns die Oaweit weg" bis
"de hackeln nix" is ois dabei
Er erzöhd wos se ned
Mit Frauen olles dan
I frog erm
wos er üwa uns söwa sogt
Und ob wir sovü besser san
Und obs vielleicht ned a daraun liegt
Dass er manche Lied ned mog
Und i frog mi ob er bei mir sei
Schwochsinnigkeitsbingo
A scho voi hod

Nochdem ma unsre Bier zoid haum
Geht er nu schnö aufs Klo
I pock dawei mei Handy aus
Und I les die Schlogzeiln duach …
Der mim Messer woa aus Mistelboch
Und de Tote ane mit Kopftuach

Beim Hamfoan deng i aun die
Gaunzen Gschichten
Vo de de nix dafir kenan
Und an de de sis sche richten
Owa a aun de de nur zuaschaun
Und scho laung nix mehr sogn
Auf de nur drauf hoffen
Das gaunz oben steht erna Naum

Owa a aun de de so wie i
Eigentlich wos sogn woin
Owa ned wissen wia
Und dafia ernare feign Goschn hoin

Und wos daun bleibt
Is Ratlosigkeit
Owa ans was i mit Sicherheit
Mitn Hossn kuma ned weit

Und wo daun bleibt
Is Ratlosigkeit
Owa ans ans was i mit Sicherheit
Mitn Hossn kuma ned weit

Jo de Soch beim Naum nenna
Warad vielleicht amoi a Idee
Das bei de Blauen an haufn Braune san
Und de außer Hetzen ned vü dan
Und wauns sogn dass mit erna aundas wird
Griag I Aungst und i muas erna glauben
Weils erna Woaheit immer so hidrahn
Dass am End a Mehrheit haum

Owa neben dem warads vielleicht amoi guad
Waun wir Linke moi ned so duan daradn
Ois ob eh olles okay is
Und bei Problemen nur wir Schuid san

Und i was des ehrlich zu benennen
Is des schwaste wos ma duan kau
Owa vielleicht regen die Zeilen irgendwos in eich au
I hätts mit dem Liad für mi söwa zumindest amoi probiert
Weil I hob Schiss das Menschenfeindlichkeit gwingt und
Demokratie valiert

• Folk
• deutsch
• dialektmusik
• protest song
• singer-songwriter
• österreich
• Traun