Sozialplan from Sozialplan by Schönholzer&Rüdisüli

Sozialplan

Hüt wird er 55
Me gsächti‘s ihm nöd a
Er ghört no zu den allerhellschte
i de Bude da
Er isch en liebe Kerli
Vom Franz chasch alles ha
Und d Firma het entschlosse
Dä gueti Maa z’entlaa

Er hegi letschthi ghueschtet
und ei mal gfählt, letscht Jahr
und würki nöd dynamisch
wäg de vile graue Haar
Bim letschte Check Up seg er
zwar gsund und busper gsi
doch s Burnout, meined Chefe
ab füfzgi chäm das gli

Bald seg dä gueti Alti
faal und ohni Füür
Bald wärdi er en Pflägefall
das chämm de Firma z’tüür
Dä Notfall zwingi z’handle
schnell und kreativ
Statt uf die Chrankhet z’warte
seg me jetze pro aktiv

Immer chüeler weht de Wind
us de Chefetage
zieht dur üsi Bürogäng
und verbreitet
Angscht und Rage

Bald isch em Franz
sin Letschte
Das liit üs uf em Mage
Er isch de Erscht,
doch nöd de Letscht
Bald gahts üs all an Chrage
S bruucht Solidarität
es luuts und dütlichs NEI
De gueti Franz söll wüsse:
Er isch nöd allei

Scho mache mir e Sitzig
Mir rüschted üs uf d Schlacht
Me redt vo Streik
und Klassekampf
bis nach Mitternacht
Mir schmiidet Plän
und schöni Wort
Mir probed edli Geschte
Mir ringed um e Strategie
und jede git sis Beschte,
Ja, jede git sis Beschte

Und endlich denn
de Durchbruch
D Idee isch genial
E makellosi Lösig
human und sozial
und echt emotional

Mir alli gänd em Franz
en Früchtechorb
Nöd irgend so nen Chorb,
nei en Früchtechorb
Es seit doch meh
als tuusig Wort
so nen Früchtechorb
S hät doch soviel
meh z’bedüte
als nur Frücht im Chorb
Jede Mensch bruucht
i sim Läbe mal
en Früchtechorb
Drum schenked mir em Franz
en Früchtechorb

• Alternative
• chanson
• folk
• independent music
• mundart
• rüdisüli
• schweiz
• schönholzer
• song-writing
• songwriter
• theatre
• Zurich